الفرق بين أول وتاني شخطة

الفرق بين أول وتاني شخطة




أول مرة تشخط فيا فرحت اووووي .. لأسباب كتيرة

أولها انك شخطت فيها واتنرفزت علشان كنت قلقان عليا ، فحسيت قد ايه انت بتحبني بجد ، وتاني سبب علشان حسيت اننا خلاص مابقاش بيننا فرق ، مابقيتش تتعامل معايا بقى بأسلوب اتنين لسة متعرفين ع بعض واللي هو رقة بقى ومش عارف ايه ، تالت سبب علشان انا كان نفسي اشوفك وانت بتشخط علشان ما اتخضش منك بعد كده .

لكن تاني مرة لما شخطت فيا .. زعلت اوي وعيطت .. مش زعلت منك .. لأ .. انا اصلاً ما بعرفش ازعل منك لكن ... زعلت من الشخطة ، حسيت اني ما بقيتش أميرتك..

مافيش حد بيشخط في اميرته

وكمان زعلت علشان ماكنش ليا ذنب .. انا عارفة ومقدرة انك تعبان ومتضايق وعليك ضغوط كتيرة لكن.. كان نفسي تبقى زيي لما اتضايق او الدنيا تخنقني اوي اجري عليك واعيط لك واقولك شوفت حصل لي ايه ؟؟

انا لو زعلانة من الدنيا كلها مجرد ما اسمع صوتك او اشوفك بهدى وبتطمن ومش بقدر اكشر .

بس يا سيدي .. دا الفرق بين اول شخطة .. وتاني وآخر شخطة زي ما وعدتني ..
وانا مصدقاك ... مش بس علشان بحبك ..

لأ علشان أنا واثقة اني مش ههون عليك .. وواثقة اني هفضل طول عمري في نظرك اميرتك وحبيبتك ..
لو حتى فات على حبنا مليووووووووون سنة بارضو هنكون لبعض وهكون اميرتك