عارف بحلم بايه ؟؟؟

عارف بئا بحلم بإيــــــــــــــه ؟؟



بحلم باليوم اللي هشوفك فيه لأول مره وبقعد أتخيل .. هكون مكسوفة ولا على طبيعتي ؟؟ هعرف أبص ف عنيك ولا هحفظ ف شكل البلارينا بتاعتي
بتخيل ف شكلك .. بتخيل اني قاعدة بتكلم معاك وبنحكي وبنضحك وبنهزر .. وبتخيل الكلام كمان

عارف بحلم بإيه كمان ؟؟
بحلم باليوم اللي هتقولي فيه كلمة " بحبك " يااااه احساس تاني لما تكون جاية من قلب انت بتعشقه .♥

بحلم باليوم اللي هتدخل فيه بيتنا عشان تقول لأهلي " انا اخترت بنتكم عشان أكمل معاها حياتي .. لأنها هي كل حياتي " .

بحلم باليوم اللي دبلتك فيه هتكون حوالين صباعي وكل ماتوحشني أبص على اسمك اللي مكتوب عليها .

بحلم بيك يوم كتب كتابنا وانت باصصلي وفرحان وبتقول " قبلت زواجك " وسط فرحة أهالينا وعينيا اللي بتقولك " مبروك عليا انت "

عارف ايه كمان بفكر فيه ؟
بفكر ف فرحنا والرقصة السلو .. وبفكر هنرقص على أغنية ايه وبروجرام الفرح كمان .

بفكر ف بيتنا واني أخيرا هكون ليك لوحدك وبفكر من دلوقتي هسعدك ازاي وبدعي ربنا يوفقني ف ده ..عشان انا معنديش أغلى منك .

بحلم باليوم اللي أول حاجه أشوفها فيه أول ماأفتح عينيا هو " أنت " .

بحلم ان كل تفاصيل حياتي تكون معاك وليك وبيك .

بحلم بيك وانت نايم ف حضني زي البيبي الصغير .. آل ايه مش عارف تنام لوحدك .

بحلم ان ابننا يطلع شبهك وواخد كل حاجه حلوة فيك .. بس مش هحبه أكتر من باباه بردو

بحلم باليوم اللي اوريك الكلام ده وأقولك اني كتبتهولك لوحدك

بحلم ان كل الأحلام دي تبقى حقيقة .. يارب تبقى حقيقة بئا